瞓覺大作戰－20媽媽小天地

瞓覺都要大作戰 ?! 其實係訓練妹頭自己瞓......因為一直以黎佢都同我同床, 以前係大床就三個迫埋一齊, 後來換左妹頭床就爸媽分房, 媽媽同妹頭瞓 !!

其實同妹頭瞓都幾好的........因為佢係踢被大王, 蓋左無耐已俾佢踢走左......係佢隔離就可以好輕易同佢 cum 番......再踢再cum…..以前有時我陪佢瞓著我返大床瞓........不過無耐大條神經就觸動我成日彈起身去同佢cum被, 成晚就係咁跳上跳落攪到無覺好瞓.......而且係佢隔離又可以防止佢碌落床......真係唔明小朋友點解可以咁難瞓 ?!?

不過妹頭慢慢大......無可能再一直同妹頭瞓, 第時有弟妹時.....時間更加難安排!! 所以趁而家就開始呢個大作戰, 以免第時再耐D就更加難攪喇~~

剛個星期一晚......我因為個人好攰, 一早瞓左係大床, 諗住交妹頭俾貴爸.......點知到佢要瞓時佢就走入黎大哭.....喊住要同媽咪瞓! 我因為失眠了幾天, 完全無力無精神......最尾齊齊係大床度瞓 !! 第一晚......完全失敗 !!

星期二晚, 正式開始.....我同妹頭講媽咪講完故仔陪一陣間媽媽就要出去做野.....不過佢好唔願意, 佢話唔好, 話媽媽要陪好耐......我熄晒燈陪左佢一陣間, 跟住就出去.....但無耐房就傳來可憐既喊聲叫媽咪......我違有入去安撫佢, 陪佢瞓一陣, 我又出去........佢又開始瘋狂咁大哭, 今次我等佢喊多陣先入去 (唉, 睇見佢淚流滿臉都真係好好好可憐, 不過真係要硬心腸先得 !! ) 再入去再安撫佢瞓覺......可能都喊到攰喇, 一陣間佢都開始入睡, 而我先可以離開真正去做自己野.!! 第二晚.......勉強算成功 !!

星期三晚, 用同樣方法, 陪一陣間我便走出來........今次妹頭竟然好乖真的自己瞓著左 !! 心諗咁好?! 查實是我開心得太早 !! 半夜三點, 妹頭喊住走左出房搵媽媽......我同貴爸聽到喊聲先突然彈起身, 即刻走出去攬住妹頭, 我驚佢夜麻麻搵唔到我會嚇親...跟住同佢返房再瞓!! 唔知係咪佢瞓左一個 cycle, 眼仔碌碌好精神, 而我就眼瞓到死….最尾陪妹頭一齊瞓左 !! 第三晚….唉, 咁算成功定失敗呢 ?!

第四晚開始有轉機喇~~ 同左妹頭講媽媽講完故仔陪一陣就要出去吹頭髮做野.....可能佢開始習慣呢個安排, 佢無抗拒......陪佢一段後我就真的出去喇, 妹頭未瞓著, 不過亦無扭計, 乖乖自己瞓 !! 佢有時會問我媽咪你頭髮乾未? 或媽咪你做完野未? 好攪笑!!! 妹頭這兩三晚都可以自己瞓天光.....大作戰叫做成功喇~~