20媽媽小天地

話咁快已經到左2011......特別係多左妹頭既日子, 每一天都很充實, 很快就一日, 很快就一個月....很快就一年..........話咁快就已經兩歲 !!

2010年....我覺得呢年身體容易有小病痛, 可能少左運動, 身體差D !! 又唔知係咪返左學, 妹頭又易生病, 兩母女都多左睇醫生........希望值住2011既到來, 將衰氣趕走晒, 一家人都健健康康 !!  我要開始睇吓煮D咩野食去幫妹頭補吓, 強壯吓身體 !! 大家有無好提意 ??

2010年, 我地搬左屋.......但因屋苑配套問題, 始終不太習慣 !! 地方係大左, 但衣食住行就不太方便, 總唔能夠隨心所欲的要個樣有個樣 !! 如果來年有機會, 真的想搵個更位合適既地方.

2010年, 妹頭開始左佢既返學生涯 !! 漫漫長路仲有廿幾年要讀, 駛唔駛咁早入學 ?!? 其實我地原意都無諗住讀 N1, 因我地覺得兩歲人仔始終係細, 而且妹頭入讀K1時都係班里面既細B....但係留意住妹頭既發展, 又覺得呢隻小妹人細鬼大, 啖吐表現都有板有眼....諗諗吓, 與其留係屋企, 不如俾佢返學校同D同學仔相處吓, 學吓野 !! ABCD 我地識教, 但好多野例如禮貌, 秩序, 都係交俾學校易D !! 之前就用D錢黎上 playgroup.....而家就轉左黎交學費 !!

2010年, 去左大阪旅行........帶住小朋友, 旅程當然無自己兩個去咁輕鬆自由, 但能夠一家人去旅行又是另一種樂趣, 真的好開心好開心 !! 不知今年仍有無機會去旅行呢?!?

2010年, 與貴爸爸多了磨擦....多為照顧妹頭既小事 !! 唔知係咪做左阿媽勞氣多, 我的脾氣都大左, 幸好我同貴爸爸都係唔鍾意嗌交既人.....其實好多時我地都係為大家好, 但因為每日都忙忙忙, 兩個人真的少左溝通.....所以黎緊我地要多溝通, 講出大家既意見. 貴爸爸, 聽見嗎 ?!?

2010年, 妹頭進入 Trouble 2.....雖然我知這是小孩子既一個過程, 但有時真的激到我頭頂出煙.....我都唔想大聲呼喝, 但真係忍不住 !! 黎緊要妹頭唔好激我, 我估無咩可能.......遺有自我提昇 EQ, 提醒自己小朋友既發展係咁 !! 而家有時既折衷方法就係佢扭計我無符時, 就交棒俾貴爸爸去處....暫時都 OK....起碼減少我"怒吼"既情況 !! 

2011年..........人大左, 希望都變得簡單 !! 我希望一家人齊齊整整, 平平安安, 每日都開開心心!! 希望身邊的家人朋友, 個個都健健康康 !!