20媽媽小天地

8月25日, 星期二, 呢日我地會係藍山留一晚, 所以只執左一箱小行李, 其他就寄放係悉尼既PARKROYAL酒店度.   因為藍山係山區溫度相對低好多, 我必須為兩個小朋友做好保暖!! 

大朝早........我地出發喇~~

好多人怕藍山路程遠好難去, 要參加local tour. 我睇過其實路程好簡單……..火車已經可以直接去到藍山既小鎮. 我地係Town Hall搭火車去Central Station, 唔駛出閘, 再轉去Katoomba方向既火車月台, 車程大概兩個小時十分鐘就到 !  

我地係 subway 買左早餐.....係火車站出便食.......

一個鐘一班車, 我地唔趕唔駛太早......搭9:18分由Central開出既火車!

兩個鐘既車程兩個妹一d都唔悶……..

因為d椅背可以前後方反來反去, 佢地淨係係度玩d椅背都已經笑到停唔到口~

One...Two.....

Three......Haaaa Haaaa~~ (兩個笑到碌地 !!!!!!!!!!!!) 

火車去到Katoomba大概 11點幾……一出左火車站已經感受到高山既涼意!! 好似只有8-10度左右, 好寒呀~ 好彩帶夠衫咋!!  我地住藍山青年旅舍, 沿住主大街一直行就見到, 好易去!!

兩個小朋友入到 YHA 好興奮, 見到大大既客廳同廚房, 超開心的不停走來走去!! 上到房見到張碌架床即時跳左上去玩!!!

我地放底行李就出去搵地方食野……都係簡單的漢堡同燒雞!!

趁天氣好, 我地先搭巴士去 Echo point 欣賞美麗既三姐妹山! 望住廣闊既群山, 真的身心舒暢!  空氣都特別清新! 好舒服呢~~

一個美麗既傳說吸引到世界各地既旅客黎一睹佢地既美貌, 我地當然都要搵靚位同佢地合照喇~

因為藍山種左好多好多桉樹(又稱尤加利樹)，太陽一曬，呢種樹既樹葉就會釋出一種藍色樹油同塵氣，飄係半空，積聚係山峰同山頂，形成一團藍藍地色既薄霧，因而叫"藍山". 

睇完 Echo point, 有d人會搭車去 Scenic world 坐唔同既覽車, 而我地就選擇用雙腳去探索呢個美麗既地方! 我地沿住 Prince Henry Cliff Walk 行去 Scenic world. 

一路行, 沿途風景好靚, 天色好好, 如果有時間的話, 強力建議行一圈呀~

大自然的鬼斧神工.........贊呀~ 

有好多好靚既影相位...............

呢個位危險, 但超靚!!!

大概行左一個小時左右我地就到Scenic world…..根住就坐小朋友好興奮既覽車由唔同角度遊覽!! 

好可愛的兩姐妹 !!  

見到覽車, 終點在望!!

我地乘坐既次序係 skyway ---> railway ---> walkway ---> cableway. 呢個次序都唔錯呀, 又好睇, 又好玩!!

Skyway 高空欣賞既瀑布.........

好靚 !!  

跟住呢個向下沖既 railway 好正!!!  兩姐妹留言先................

由下向上去欣賞........

三父女.........Haa Haa !!

Walkway 有唔同長短既路程, 因為時候唔早, 我地選左條短既黎行.......沿途介紹以前既煤礦業同周圍既植物, 好有家樂徑 feel !!

我地最後離開 cableway 都接近5點, 天色已晚, 山上既氣溫都下降好多….我地就搭番巴士返去 YHA, 

686 可以用 Opal Card, 好方便的!! 

因為晚餐同第日早餐都係自己煮, 所以落車先去 YHA 後面既超級市場買物資先~

同兩個小妹沖個熱水涼, 跟住就落去廚房煮野食…呢個時候既YHA好熱鬧, 因為個個都廚房忙碌呀!! 我地食得簡單, 意粉, 煎薄牛扒, 腸仔煎蛋….妹頭有得幫手做小廚師, 佢好興奮呢~

呢個係度攪攪震!!

偷食永遠係最好味的!!

食完野清洗完畢, 兩個走去電視房到睇卡通片, 我地就坐係火爐邊d梳化上吓網, 睇吓相, hea吓, 好寫意呢~

Blue Mountain YHA, 我 book 既係四人家庭房, 雖然設備好簡陋, 不過只住一晚, 無所謂啦!! 我book間房沒有連洗手間, 但洗手間正正係我地間房對面, 而且好乾淨, 我地入住其間都唔見有其他人用, 超方便呀!!

好乾淨, 仲有暖氣 !!