20媽媽小天地

尋日係妹頭幼稚園一年一度既畢業典禮, 因為妹頭有份上台表演, 我同貴爸都特登請左假去捧場 !!

地點係位於土瓜環既高山劇場

一早知道小朋友會上台表演, 做媽媽既真係緊張過個女......我都唔知點解!? 呢D可能就係為人父母之後自然產生既特質..........."神經質".....

早上十一點幾就帶左妹頭返學校安排化妝換衫, 而父母就三點幾自行去會場睇表演.....

因為今年高班既哥哥姐姐去左迪士尼度畢業旅行, 所以台上既佈置都以迪士尼為主題....

兩位靚老師負責做中英文司儀....

各位主禮嘉賓就坐喇~~

一輪嘉賓演講之後,就到頒發畢業證書喇......學校好有心思咁做左影片配埋音樂, 令人好感動 !! 我相信如果係畢業生既父母, 看見自己既寶貝畢業必定會忍不住眼淚....

三位畢業生代表致謝詞.....用兩文三語既方式, 超掂呀 !!

跟住係送母校記念品, 雖然我相信呢個係老師幫手做既野, 不過好有心思呀~~

接住係頒唔同既獎項, 我好心急....因為妹頭有份攞獎!! 哈哈~~

PGS (即N1) 既禮貌獎.....

PGS 既清潔獎.....香橙組許樂程..........著左準備要表演既服裝, 好可愛!! 

我原以為呢D係鼓勵小朋友既"豬肉獎", 原來唔係呀, 每班得三個咋~~

頒晒獎就係睇表演喇, 超期待 !! 呢個就係妹頭既班主任 Ms Ching 喇~

妹頭一開始俾人遮住左.....又八卦周圍望.....不過見到佢地咁細個上台跳舞, 真係好可愛~~

主題係 UNDER THE SEA, 大家細心欣賞......

終於出黎見到樣.....哈哈哈哈~!

寶貝既第一次....好叻叻呀~

PGS 表演完, 跟住就係K1 既斗奇兵

低班既泰山之旅...

最後就係畢業哥哥姐姐既勁歌熱舞~

結尾由畢業生家長分享感受.....一個又溫馨又感人既 ending !!!

做父母既...希望子女學有所成, 但又不忍心見佢地長大得咁快.....好矛盾啊~~