20媽媽小天地

10 May 2011 Tue Day 5 - Last day  天壇, 前門大街

今日無咩行程, 食完早餐後決定補番去第一日 missed 左既天壇, 地鐵可直達, 超方便 ! 天壇係明,清兩朝天子用以祭天既地方, 令人感覺好神聖 !!

天壇里面既環境好舒服, 好多草地同徊廊, 配合得好好~

老人家好似70歲以上就兔入場費, 所以好多本地人都入去晨操, 或跳舞, 或捉祺....好好既一個休閒地方 !!

八卦的妹頭, 不停問"佢地係度做咩呀 ??"  "伯伯係度玩緊牌呀~"

超靚的大草地.......

天壇既大殿  -  祈年殿

上去喇上去喇~

呢個叫回音壁....好多人係唔同既地方講野, 睇吓對方聽唔聽到 ! 實驗証明係聽唔到既......究竟點樣回音法呢 ?!?

呢塊係天心石, 皇帝就係係呢度同天講野........好多遊客係度做"如來神掌"既姿勢, 呢兩個遊客就.......

離開時有姨姨婆婆賣D小玩意....妹頭走過去同婆婆講 "我又要玩~~"

北京天氣乾燥, 妹頭擦擦吓個鼻就流左D 鼻血.....

佢好緊張....不過媽媽覺得好好笑~~ 哈哈哈哈 !!

只係少少, 好快無事喇 !!

中午12點左右我地搭車去前門大街食出名既都一處燒麥館....點知就開始左今日既惡夢 !! 都一處燒麥館出名食鮮肉燒買....不過唔知點解佢地出菜超慢, 三吹四請遲遲先有得上菜, 另菜館通風又差, 熱死人, 我真唔明點解會咁出名 ?!

問題黎喇, 我地原先應兩點左右到酒店攞番行李約三點去到機場 (我地班機 5:30 開)....點知就係呢餐, 等到食完都已經 2:30 !! 拿拿聲趕返酒店....因為搭地鐵要轉好幾個站 (北京地鐵轉線都要行幾遠吓, 又要上落樓梯), 我地就決定直接搭的士去機場 !! 呢一搭.........死喇, 見識到北京最出名既.........塞車 !! 司機都知我地急....可惜就係無辦法郁....兩個人坐係車到乾著急....應該話急都無用 !!!

唉, 去到機場已經 4:40 左右, 無可能上到機 !! 我地即刻問櫃檯, 佢地幫我地 check.....另外既航空公司有7:30既機位....即刻買機票咁先返到香港....

幸好上到機既三口子.....

呢個真係一個好貴 $$$ 既教訓.....以後無論去邊度旅行, 去機場真係要預留足夠既時間, 唔好諗住係大陸或落後地方就無所謂 !!