20媽媽小天地

11月開始, 妹頭就插班做 N1 生...幸好學校係屋苑里面, 我可以送佢返學再返工, 雖然每日返工趕趕趕都係會遲到 (好彩公司唔係太 straight), 但可以每天陪阿女返到學校, 我覺得點趕都好值得 !!

其實望住妹頭入學校, 做媽媽既我個心覺得好唔捨得......大個女了, 開始離開媽媽了 !!

11月1-2日, 妹頭返一個鐘........因為未知發生咩事, 無喊過. 老師話妹頭表現 OK, 好定.......一個鐘後我接佢放學都無野 !!

11月3日, 返兩個鐘.........開始 feel 到返學原來要同媽咪分開, 去到學校門口已經喊晒話唔去, 死捉住我, 睇見都覺得好可憐. 我陪佢去到課室交俾 Miss So 先離開......放學由爺爺去接佢 !!

11月4日開始, 老師話妹頭適應到, 可以開始返正常三個鐘, 放學跟校車去到翠林爺爺度 !!

頭兩個星期, 妹頭每朝都喊住返學, 基本上係知道要同佢返學已經想喊 !! 去到學校佢即喊....捉到實一實, 唔肯落地, 唔肯揹書包........唉!! 我知呢個係一個過程, 不過, 妹頭, 媽咪睇見你咁都好心痛架 !!  佢話: "我唔想返學呀 !!"  要解決呢個問題, 我開始每日同佢做d思想準備, 我時不時都同妹頭講: "樂程 (我開始改叫名, 唔叫妹頭喇!!), 返學真係好開心, 又有得砌積木, 又會唱歌, 又跳舞, 又有得食茶點. 好快就放學搭校車見到爺爺, 食粥仔, 瞓覺覺豬, 好快爸爸就黎接佢, 返屋企就會見到媽咪~" 聽吓聽吓, 妹頭都好接受呢個事實......其實, 我覺得佢返學應該適應到, 我每晚都問佢返學開唔開心, 妹頭都會答我開心(應該唔係是旦答我吧!!!), 我諗佢只係唔鐘意朝早返學時要同媽咪分開個感覺 ! 

幸好, 只係喊左兩星期.....第三個禮拜, 上學途中我又同佢做思想準備, 妹頭自己都會好開心咁講爸爸黎接佢, 然後見到媽媽.....去到學校門口我見佢有點唔捨得, 不過無喊可以自己行入學校....到上星期第四個禮拜, 妹頭終於都習慣喇, 係門口可以同媽媽 Big kiss 之後自己揹住書包行入課室. 見到D小朋友一個一個揹住書包自己行, 好可愛, 又好驚嘆原來兩歲人仔都可以咁叻 !!