20媽媽小天地

３月２４日，Day 4

可能時差的關係，我每朝５點左右便會醒，頸仍然好痛，無辦法只好 "自我鬆筋" 一番．　"Meteora" 係好出名既景點，有幾座修道院 (以前好似有成２０座之多) 聳立係好險要既高山岩頂之上，有 D 而家都仲有修道士 / 修女住響里面！　Meteora 位於希臘中部，我地要搭 5 小時火車先到佢附近既小鎮  Kalambaka !! 　搭朝早8:20 am 火車，到站時已接近下午 2:00．　我地把握時間，先搵的士車我地上修道院  ( 因為有 D 修道院午後好早就關門), 　我地同的士佬講價，　佢要一小時 20 euro, 我地最後講定三小時 50 euro, 同行仲有個女仔 join 埋我地一齊．　

高山的天氣真的變幻莫測，　我地去到時落緊大雨，好大風，仲涷到嘔.................簡直就係 "考驗"！！　不過岩頂上的修道院真的好利害，好難想像以前拜占庭時期  D 修士點樣興建！　Meteora 全部都係一座座既高岩，好 "筆直"，真的好令人驚嘆！！　入修道院入場費每人２euro，而女士就要著裙!!!! 　我地著褲的，門口都準備左一條條既圍巾俾我地圍上．　講真...........著左褸再圍條巾，個樣好笨好論盡！！　修道院里面燈光好昏暗，仲有好強既 "酥油味"  (唔知係咩味做成，但幾難頂！)............所有牆同天花都畫滿壁畫，仲有好古老既吊燈同祭台！！ (里面太暗，我反而覺得有點恐怖......) 參觀時要保持寧靜，以免破壞環境！　

我地用左約３小時參觀左 ３ 間修道院，其他的都已關閉或休息．　回到 Kalambaka 都已約 5:00 pm, 我地跟住要著手搵過夜既酒店 (之前無 book到)..........撲左兩間，好快選定左，雖然價錢超左 budget, 但都算了，因為淋左雨個人好涷好tired！！  酒店望到險要既高山，幾好 view!!  我地沖左熱水涼，舒服晒瞓覺休息吓！　８點左右出去搵食，有間 Super Market, 謝天謝地！！ 雖然細細地，但已經係希臘咁耐見過最齊全既一間 (唔知點解連雅典都無.........好奇怪！），我地買左第朝早餐就去食熱辣辣既晚餐！　離開餐廳又落起毛毛雨，唔理咁多，我地急急腳返酒店休息..............