20媽媽小天地

嘩, 再唔寫就唔知幾時先會寫喇....要嗱嗱聲先得......

4月17日, 好想出去郊遊吓, 決定去南丫島......其實南丫島都幾方便架, 雖然係離島, 不過係中環只須半小時船程就到, 對我地呢d有小朋友既家庭黎講係幾方便既.......我最怕就係要坐好耐車, 大人無所謂, 小朋友無耐性就比較難攪 !!

妹頭, 你咩事咁既樣?!

上船喇~~

可能架船搖搖吓, 妹頭話: "媽咪, 我好驚呀~", 不過我睇佢個樣唔係好似, 反而似咋嬌多d.....咁我都會交足戲:" 唔駛怕, 爸爸媽媽係度, 我保護你...." 哈哈哈哈~~

有我同佢玩, 邊度會驚 ?! 你睇佢個樣幾開心~~

我地落船約12點度, 搵個地方食左野先.....最尾係碼頭既酒樓飲茶, 對住個海, 一盅兩件, 爽呀!!

食完野入去行吓......原意想行去沙灘度玩吓沙......不過我地太耐無黎南丫島喇, 唔記得左點行 !?!  行行吓行左入村, 唔識點行反出大路.....真係想死 !! 路在口邊, 問晒人之後, 終於行啱向沙灘進發.......可惜, 天有不測之風雲 !!! 其實天文台都預告呢日會落雨.......個天開始有小雨點......我地想再行, 但個勢似乎係要落場大大既, 唔好博喇, 都係折返以免越行越遠 !!

竟然見到樹上未熟既桑子 !!

好簡單的小雞啄米....妹頭好鍾意 !! 呢D大陸玩具應該係超平, 但呢度要幾十蚊呀, 用黎呃鬼佬 !!

雖然唔去沙灘, 不過一場黎到, 點都要食吓出名既山水豆腐花 !! 哈哈哈 !! 睇我地個樣就知好味 !!

我地行返出碼頭, 係d鋪頭逛吓.....3點幾出番去, 正好趕到 3:30班船 !! 真係好彩上左船咋....跟住就超大雨喇 !!  Lucky !! 後來先知原來場雨大到掛黃雨啊~~

南丫島.....要搵機會再去先得 !!