3月25日 @ 寶康公園－20媽媽小天地

上星期五, 妹頭學校定為老師發展日 (全校老師都走左去發展....哈哈哈~~), 所以有一日假期......我就特別攞日假同佢親子吓~~

原先都好多諗頭....嗯, 不如我地去海洋公園, 又或者去郊區, 又或者去太空館/科學館....但諗到妹頭無耐就要扭抱, 我就真係攞黎攪, 我一個人都係不宜"遠行" !! 問妹頭佢想去邊度, 佢就好簡單直接話去公園 !! 小朋友其實很易滿足, 唔係太需要去邊度邊度 (其實係大人想...), 有個地方俾佢玩, 俾佢跑跑跳跳已經可以好開心!!

寶康公園, 係我好鍾意去既公園, 地方大又多小朋友玩既設施, 又近屋企, 玩完食野又方便, 跟住妹頭就可以返屋企瞓晏覺!! Very Good !

呢日有段小插曲我覺得好好!! 話說妹頭是超級為食妹一名(呢點相信好多人都知!!), 佢有個壞習慣就係如果見到人有野食, 不論係大人定細路, 佢都會即刻行過去望住人Ｄ野食.....跟住會話：我都想食 / 佢唔俾我食....類似既說話 !! 其實真係好好好醜怪的 (唔止佢, 我都好醜怪!!!) 同佢講佢唔聽，拉佢都唔肯走 !! 我地講過好多次唔可以咁樣望住人, 真係好無禮貌, 但佢就係次次都係咁....唔知仲以為我無俾野佢食 tim.....

好喇當日既故事係妹頭離遠望到個婆婆手攞住包薯條既東東,佢即刻走過去眼定定咁望住人, 我當然走埋過去, 佢望住婆婆話"我都想食", 我即刻話: "樂程，唔得架，係姐姐架 !!" 個婆婆等緊佢孫女 sir 滑梯，跟住佢話："吓, 呢包? 姐姐架, 佢實唔會俾你架!!" 我和應就叫樂程走，但佢屎唔肯走，仲想扭........跟住婆婆好直接話："呢個, NO, 唔得呀 !! 做壞姿勢，唔可以咁呀!! 婆婆唔係姑寒唔俾你，不過咁樣係好無禮架!! " 嘩，咁好機會，我順勢教導妹頭咁做唔啱，係好無禮貌既......bla bla bla bla.....!!