澳洲13天之布里斯本 South Bank Parkland, Queens Street Mall @ 20媽媽小天地

旅行返來一個星期, 趁記憶新鮮拿拿聲的起心肝寫遊記, 如果唔係, 遲d真係會慢慢唔記得呀~

8月17日晚上8:45 分既航機, 我地預早兩小時到機場, check in 寄好行李後, 我地梗係去食個晚餐先啦!!

兩個女目送D行李......好攪笑 ^^

呢個時候, 剛好機場有個萬馬奔騰展覽, d馬仔好靚呀~

我地準備上機喇~

今次坐既係澳洲航空 Qantas, 差不多9個鐘既機程.........我地一家四口坐一排, 坐位都ok呀! 兩個小妹一坐底已攞耳筒黎睇電影, 好興奮呢~

飛機準時起飛......因為是夜晚機, 晚上12點左右就關燈俾人瞓覺, 我地當然都安撫兩個女瞓覺啦.......幸好係咁細既環境佢兩個都瞓到, 係媽咪我慘d, 兩眼合左成晚都瞓唔著, 陰公!

我地18日朝早7點半已到布里斯本機場喇..........

Welcome~~

因為澳洲海關查得好嚴格, 好多野都唔可以帶入境的....所以入境好慢, 關口大排長龍, 不過我地無帶違禁品, 順利過關!

因為無租車, 我地係Brisbane同Gold Coast就要用GO CARD, 可以乘搭所有公共交通工具. 因為布里斯本機場無地方買GO card, 我地先買紙車票搭火車出市區. 布里斯本係一個商業城市, 我地計劃只留一天重點行吓….

澳洲火車/電車, 如要開門係要特別按制的, 同我地香港唔同, 好有趣!

小插曲: 每次旅行樂程都會帶佢既至愛羊咩咩出門, 而予晴就帶佢隻小猫猫……….不過, 今次係第一程飛場去酒店既火車途中, 予晴就漏底左佢隻毛公仔係車上, 落左車先知道! 噢~~! 佢唔開心呀, 不停話:"我隻猫猫呀~~!" 不過好彩呢個小妹好快就tum番!! 希望猫猫係度會遇到另一個愛鍚佢既主人啦~

酒店Hotel Jen Brisbane, 係正火車站Roma station隔離, 好近好方便!! 布里斯本住近Central station或Roma station都好, 一黎機場搭火車唔駛半個鐘, 二黎去黃金海岸既火車都係經呢兩個站, 唔駛周圍搵, 好方便的!

出左火車站向左一直行就到喇~

係酒店放好行李, 我地就出門口喇! 天氣超好~~

第一站, 先去South Bank…..呢個係城市中既一個綠洲! 我地係火車站買左GO card, 先搭去South Brisbane station. 雖然係冬天, 但陽光好猛, 唔會好凍! 呢邊有國家美術館, 博物館, 圖書館, 全部係晒一邊, 共通點係..….都有免費Wifi俾我地呢d旅客上網, 哈哈!!