20媽媽小天地

因為機場個rate 唔好, 所以第一晚我地只係暢左$2500 用住先………諗住出明洞先再暢~

由仁川機場去酒店, 我地搭機場巴士 6015 號, 係乙支路2街落車, 再行5分鐘左右就到……….. 我地上車先俾錢, 車費每人15000 won (成$100一位), 不過我地兩大兩少, 而家做緊3人家庭額外送1位既優惠, 另外 show coupon 又可減1000 won…

因為已經好夜, 我地放低行李就拿拿聲出去睇吓有咩食………….見到明洞牛骨湯有開, 咁啱又有其他香港人經過話呢間係推介, 我地都唔理咁多, 一於試吓! 牛骨湯好清淡, 個餃子好大粒好飽滿的, 好味道 !

另外又叫左呢個甜牛肉, 好好食~

個餃子好大粒好足料 ^^

食完飯, 就返去沖涼瞓覺喇~

8月18日, 天晴! 今日我地既旅程正式開始~

今日我地預約左去小朋友打工天地- 首爾Kidzania, email 通知我地大約9點去到攞飛, 不過兩個都瞓到唔願起身, 人生路不熟, 我地一開始又入錯地鐵方向…..所以成差不多10點先去到!! 由地鐵行去 Kidzania , 成條路都無咩人, 我以為因為返工時段先咁靜………點知一開門入去 Kidzania, 嗶~! 簡直係人山人海, 超多小朋友呀!! 應該係所有人都塞左入黎 ?!?  我地跟指示去攞飛俾錢入場......兩大兩細, 多謝  156,000 won ! 

兩位小姐好忙, 打左好多份工.......我地買既係全日飛, 真係由天光玩到天黑呀!!

因未食早餐, 一開始, 先去整漢堡包~ Haa Haa~

跟住排隊玩左好多, 超市啦, 裝汽水啦, 漆黑探索啦.......

又分頭行事....家姐去插花

阿妹就去救火~

貪靚走去做空姐........

我地發覺整野食最好玩...............所以我地既策略就係整完一個野食, 即刻排另一個, 係等既同時 (要等起碼40分鐘) 就可以慢慢享用辰頭先整既食品!

呢個係朱古力~

完成品 ^^

呢個係牛油曲奇............

呢個雪糕窩夫好正~

整完梗係要即食 ! Haa Haa~

好多人都問溝通唔到點玩?  其實無問題的, 因我地玩既都係動作為主, 有姐姐教你點做, 小朋友跟住做就得, 一D都唔難.....佢有D真係要識聽指令或要理解佢講咩既, 佢都會話俾我地知, 等我地玩過第二D~

佢地玩左全日.........我同貴爸就等左全日 !   走得喇~~~~~

我地玩到7點左右就走人喇......因為換錢所好多只去到8點幾, 我地身到無咩錢......決定唔去原定既盤浦月光大橋, 改去明洞暢錢先!! 我好期待一路望住盤浦月光大橋既彩虹噴泉, 一路食住炸雞...............希望下次有機會啦~ 

攞完錢, 個人踏實左好多...哈哈哈哈~ 我地係明洞掃街, 好開心好好味呀~

呢個細小姐頂唔到要搵搵周公...............

呢個大小姐就可以獨享長長既軟雪糕喇~~

我地最後再買埋 TwoTwo 炸雞返酒店慢慢嘆! 爽呀~~