8月19日, 星期三, 天晴
我地準備搭朝早8:32既火車去Gold Coast, 所以7點幾就check out去買麥記早餐喇~
到喇到喇~
個多鐘既火車, 兩個小朋友玩吓, 睇吓書, 講吓故事好快就過……
我地係NERANG STATION落車, 轉巴士740去Surfer Paradise.
我地酒店係Q1對面, 不過原來巴士唔經Q1既, 諗緊點算之際, 澳洲人真的很好人, 有個女士主動問我地去邊度, 原來要再轉電車, 佢都係同一個方向, 教我地係邊個站落車…..我地好順利就去到酒店喇~!
好舒服乾淨既電車車箱~
酒店Watermark Hotel & Spa, 在電車站Surfer Paradise側邊, 又係超方便就腳! 放底行李, 我地出發去同陽光玩遊戲喇~
我既行程, 首先搭電車去Southport Broadwater Parklands, 一個免費既公園, 俾兩個小妹伸展吓筋骨先~
我地因為心急, 早左一個站落車, 攪到要行一段路先到………下次都係要對自己做既功課有信心先得!! 一見到個公園, 兩個小妹飛奔過去呀! 環境好靚又好多野玩, 兩個開心都不得了~
wow wow 女泰山黎喇~~
予晴要護住飛......唔係陣間飛左落地下!!!
開心的笑臉就係媽媽最想見到架喇~
有個係沙上既大大彈床, 超好玩的~~~
呢個樂程彈到停唔到落黎~
大家不停咁彈呀, 跳呀, 彈呀, 好開心呀~~ Haa haa~
公園另一邊係玩水既地方, 個池連住大海, 相信夏天一定好熱鬧好多人黎玩呢~!
玩完走番出去大街搵704巴士站, 搭去Charis Seafood (同司機講Grand Hotel就會話俾我地知係邊度落). 點解黎呢度呢?! 因為呢度每日中午1:30都有個餵塘鵝環節! 話說呢間位於海邊既海鮮店, 佢好耐之前開始, 將海鮮剩底唔要既魚骨掉左去, 咁d塘鵝就走過黎食……..久而久之, d 塘鵝就習慣中午1:30係對岸飛過黎呢度開餐!!
我地去到已差不多一點半, 沙灘已經聚集左一大班塘鵝係度……隻隻眼仔碌碌, 好多好壯觀!!!!!!
我行落去影幅相, 隻塘鵝可能以為我掙位搶食, 用個嘴推我, 嚇到我走都走唔切呀~!! 當職員推住幾桶”食物”出來時…..d塘鵝頓時緊張起黎~ 哈哈!
職員掉d魚出去, 佢地即時掙住搶……..之後又邀請d途人試吓餵, 我當然都去試吓啦, 好有趣的!!
餵完塘鵝, 我地就入鋪頭搵食!! 好新鮮既海鮮呀~~~
真係眼闊肚窄…..叫左個picnic set既炸魚薯條餐, 對我地黎講實在太多喇!! 炸魚, 炸蝦, 炸魷魚圈, 炸蟹棒, 炸菠蘿, 炸薯條….新鮮好食, 但一大盒實左太多食唔晒!!
除左一大盒海鮮, 我地仲叫左生蠔, 燒三文魚, 牛油包.....
海鮮鋪係無位食野既, 我地只好坐係出面, 退望住個大海食野好似好舒服, 其實有個危險.......就係周圍都有好多Ibis同海鷗對你既食物虎視眈眈……你要一眼關七望住你d食物同d雀.......如果唔係, 好似我地就食食吓俾賊仔Ibis偷走左件炸物!!!
說真的....生蠔好好味呀!! 哈哈~
侍機等食中......
請d我食好嗎?!?
食完野係沙灘側邊又有個小公園玩吓, 幾寫意~!
海天一色, 好靚~
傻的媽..........
我地跟住就搭番704巴士去下一站: Harbour Town Shopping Centre…..呢個係一個大型既outlet, 我地去到第一件事係買生果!! 哈哈!!
成日食埋熱氣野, 梗要食多d水果啦~~
係 shopping center 周圍行吓, 不過興趣同購買慾不大……..都係影吓相算了~
Candy Land......兩個女流晒口水........
如果有時間, 都可以慢慢行尋吓寶!
4點左右, 我地就搭番車返酒店, 準備今晚既節目: 上山睇藍光虫! 呢個團我之前已係網上同旅行社book左俾左錢, 佢包括係Hotel Grand Chancellor 里面既Hanlan’s restaurant 食自助餐, 跟住就包車包導遊去睇藍光虫.
Hotel Grand Chancellor 離我地酒店好近, 只須幾分鐘步行.....我地六點左右到, 就開始食野..........自助餐野食不多, 不過時間仲早我地都唔係肚餓..........簡單墳飽肚子便算了!
食物款式唔多, 不過兩個女唔駛錢, OK啦~
大概7點20分, 導遊就集合我地開車....首先每人派個小小電筒仔, 因為去到山上真的好黑, 要用電筒照明先得! 車程大概40分鐘左右...........領隊先講解什麼是藍光虫.....跟住我地就一路行一路介紹山路上見到既自然環境, 同埋慢慢越來越多既藍光虫, 黑漆漆既環境, 一點點一點點既藍光, 都幾有趣架!!! 為左保護藍光虫, 我地唔可以用閃光燈影相或任何發光既野, 不過就算影都睇唔到, 因為我估要超大光圈同超捕光先可以係山洞內影到一點一點既藍光虫!!
全程行左大概 45分鐘, 最後就上車送回酒店!
小記: 話說我地行完街返到酒店又未出發去自助餐時......貴爸就係床到休息吓.......不過兩女就精力旺盛不停係度跳呀跳, 突然"啪"一聲.........貴爸眼鏡被跳爛左呀~~~~~~~~ 天!!! 係度點配眼鏡 ?! 最後........貴爸既折衷辦法就係.........佢買左幅黑超, 再將鏡片貼上!!!!!!!!!!!!!!
酒店Watermark Hotel & Spa 分享
洗手間較簡單, 不過以我地呢個價錢, 真的超值呀~
留言列表