20媽媽小天地

2月1日, 年初十喇~

因為大肚 dum, 呢個新年都無周圍去.......反而邀請了朋友到我地屋企團拜, 雖然搬左黎成年, 不過好多朋友都係第一次到府上, 妹頭做主人家歡迎朋友, 超熱鬧呀~~

年廿九晚, 我地到爺爺家食團年飯, 因為年底忙都無機會行花市, 食完飯我地就聯同伯伯一家同姑媽一齊貢出去行將軍澳花市,係寶康公園個球場, 雖然型式少少都叫應吓節開心吓~ 

返到屋企都夜，拿拿聲的妹頭上床瞓, 留番我同貴爸一齊對住電視倒數迎接龍年.

年初一, 年初二, 我地主要返男家同外家拜年, 呢幾日勁凍, 氣溫得個8度9度,  里係室內飲飲食食就最好 !! 

估唔估到妹頭係度做咩 ? 佢好用心咁找搣瓜子呀~~

年初三係爺爺生日, 年年都會同爺爺過...........我地食完晏就放妹頭係爺爺處瞓晏覺，咁我地兩公婆就蛇出去難得拍拖睇場戲........點知睇完戲返到去先知原來妹頭無瞓到一直係度等我地,  又喊到屎........仲問我媽媽你去左邊?  我話爸爸媽媽去買麵包........佢話: 點解你去咁耐既?!?  Errrrrrr..........可憐呀~

年初四就開始招呼我地既好朋友喇~~　

一早約左 Annie 佢地呢日黎打邊爐，一齊去買火鍋料......我地個小家，因為傢具少，又實用率高，可以容納到十幾人一齊 gathering, 勁呀 !!

年初五早上帶埋妹頭一齊去健康院同細B做例行檢查，晩上妹頭就去上音樂堂，呢日叫做乖乖休息吓啦~

貴爸要開工, 料幸好有黃媽媽同我一齊去, 幫手睇住妹頭.....

年初六，我地一班 C9 Sqn 既兄弟姐妹仔仔一堂，好齊人呀 !! 我地 C9 Sqn 真係越黎越強大，食野都要大人一枱，小朋友一枱喇~~   有咁多寶貝，要影張相都真係好難呀!!

年初七人日，夜晚約左 Shuk Ling 佢地食飯團拜，日頭就一家人去郊遊吓!! 我地又去左大美篤摘士多啤梨，今次特登搵D唔係太熟既（上次太紅，一個下晝已經焗熟左 !!）, 但就好大粒，仲可以分幾日食…..Good 呀~

好大粒架~~

摘完我地返出去大美篤食個 lunch, 租左架家庭單車踩去水霸呀…..第一次踩家庭單車，好開心! 不過貴爸話下次都係要分開踩，因為媽媽成日揸流灘 !! 哈哈哈哈~



係水霸食薯片, 超爽~

初八，初九，收拾心情開工 loo.....
 

今次前後放左九日悠長假期.....真係放到人都唔想返工呀!!  期待二月過後既產假，不過到時想抖都難，我估有排忙呢....